jo aaya hai use jaanaa hai ik din — Karamat Ali Karamat

main shuaa-e-zaat ke siine mein gunjaa huun kabhi
aur 'karaamat' main kabhi lamhon ke khvaabon mein rahaa

achchhaa hai yaa kharaab nahin is se vaasta
phuTaa huaa ye meraa muqaddar mujhe aziiz

manzil pe bhi pahunch ke mayassar nahin sakun
majbur is qadar hain shuur-e-safar se ham

koi zamin hai to koi aasmaan hai
har shakhs apni zaat mein ik daastaan hai

hamesha aag ke dariyaa mein ishq kyuun utre
kabhi to husn ko gharq-e-azaab honaa thaa

ye apne hi kirdaar kaa hai natija
jo rab ki taraf se ye ham par ghazab hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

ghurur bhi jo karun main to aajizi ho jaae
khudi mein lutf vo aae ki be-khudi ho jaae

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai