ab aa gae ho to Thahro kharaaba-e-dil mein — Makhmoor Saeedi

dil pe ik gham ki ghaTaa chhaai hui thi kab se
aaj un se jo mile TuuT ke barsaat hui

bas yunhi ham-sari-e-ahl-e-jahaan mumkin hai
dam-ba-dam apni bulandi se utartaa jaaun

'makhmur' kaisi raah thi ham jis pe chal paDe
aai thi jis taraf se usi samt phir gai

main us ke vaade kaa ab bhi yaqin kartaa huun
hazaar baar jise aazmaa liyaa main ne

ho jaae jahaan shaam vahin un kaa baseraa
aavaara parindon ke Thikaane nahin hote

maslahat ke hazaar parde hain
mere chehre pe kitne chehre hain

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

yahin rahungaa kahin 'umr bhar na jaaungaa
zamin maan hai ise chhoD kar na jaaungaa

be-vaqt agar jaaungaa sab chaunk paDeinge
ik umr hui din mein kabhi ghar nahin dekhaa