aasmaan jhaank rahaa hai 'khaalid' — Khalid Sharif

bichhDaa kuchh is adaa se ki rut hi badal gai
ik shakhs saare shahr ko viraan kar gayaa

'khaalid' main baat baat pe kahtaa thaa jis ko jaan
vo shakhs aakhirash mujhe be-jaan kar gayaa

naakaam hasraton ke sivaa kuchh nahin rahaa
duniyaa mein ab dukhon ke sivaa kuchh nahin rahaa

tum khush raho hamaari duaa hai tamaam-umr
apni to khair jaisi bhi guzri guzar gai

aaj kuchh rang digar hai mire ghar kaa 'khaalid'
sochtaa huun ye tiri yaad hai yaa khud tu hai

aankh kis lafz pe bhar aai hai
kaun si baat pe dil TuuTaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge