basi hai sukhe gulaabon ki baat saanson mein — Khalida Uzma

ki mire baa'd qatl se tauba
aakhiri tiir thaa kamaan mein kyaa

idhar udhar ke sunaae hazaar afsaane
dilon ki baat sunaane kaa hausla na huaa

chale aate hain be-mausam ki baarish ki tarah aansu
basaa-auqaat rone kaa sabab kuchh bhi nahin hotaa

ziist aur maut kaa aakhir ye fasaana kyaa hai
umr kyuun hasb-e-zarurat nahin di jaa sakti

haqiqatein to aTal hain badal nahin saktin
magar kisi ki tasalli se hausla huaa hai

vo tapish hai ki jal uThe saae
dhuup rakkhi thi saaebaan mein kyaa

mere khvaabon ke jharokon ko sajaate rahiye
na sahi vasl magar yaad to aate rahiye

vo mil na sake yaad to hai un ki salaamat
is yaad se bhi ham ne bahut kaam liyaa hai

taaaqub mein hai mere yaad kis ki
main kis ko bhuul jaanaa chaahtaa huun

is bhare shahr mein din raat Thaharte hi nahin
kaun yaadon ke safar-naame ko tahrir kare

aise mar jaaein koi naqsh na chhoDein apnaa
yaad dil mein na ho akhbaar mein tasvir na ho

ye kaisaa tanaaza hai ki faisal nahin hotaa
haq teraa ziyaada hai ki hukkaam kaa tere