ham kisi aur vaqt ke hain asiir — Sarfaraz Khalid

lambi hai bahut aaj ki shab jaagne vaalo
aur yaad mujhe koi kahaani bhi nahin hai

vo bhi na aayaa umr-e-guzishta ke misl hi
ham bhi khaDe rahe dar-o-divaar ki tarah

tiri duaaein bhi shaamil hain koshishon mein miri
musibaton kaa na Talnaa ajiib lagtaa hai

siyaah raat ke pahlu mein jism ke andar
kisi gunaah ki khvaahish ko paalte rahnaa

milte ho to ab tum bhi bahut rahte ho khaamosh
kyaa tum ko bhi ab meri khabar hone lagi hai

kisi ne jaan hi luTaa di vafaaon ki khaatir
tum hi bataao ki qissa ye kis kitaab kaa hai

shab-e-daraaz kaa hai qissa mukhtasar 'kaifi'
hui sahar ke ujaalon mein gum charaagh ki lau

bahut tavil shab-e-gham hai kyaa kiyaa jaae
umid-e-subh bahut kam hai kyaa kiyaa jaae

ek qaidi subh ko phaansi lagaa kar mar gayaa
raat bhar ghazlein sunaain us ko thaanedaar ne

nazar mein shokh shabihein liye hue hai sahar
abhi na koi idhar se dhuaan dhuaan guzre

main ki ek mehnat-kash main ki tirgi-dushman
subh-e-nau ibaarat hai mere muskuraane se

subh bichhaD kar shaam kaa vaada shaam kaa honaa sahal nahin
un ki tamannaa phir kar lenaa subh ko pahle shaam karo