dil ko bhi gham kaa saliqa na thaa pahle pahle — Kishwar Naheed

mardon ko sab ravaa pa hai aurat ko naaravaa
sharm-o-hayaa kaa shahr mein charchaa bhi hai ajab

hamein dekho hamaare paas baiTho ham se kuchh sikho
hamin ne pyaar maangaa thaa hamin ne daagh paae hain

us ko fursat bhi nahin mujh ko tamannaa bhi nahin
phir khalish kyaa hai ki rah rah ke vafaa DhunDhti hai

dil mein hai mulaaqaat ki khvaahish ki dabi aag
mehndi lage haathon ko chhupaa kar kahaan rakkhun

kuchh din to malaal us kaa haq thaa
bichhDaa to khayaal us kaa haq thaa

kaun jaane ki uDti hui dhuup bhi
kis taraf kaun si manzilon mein gai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

mohabbat ek khushbu hai hamesha saath chalti hai
koi insaan tanhaai mein bhi tanhaa nahin rahtaa

apne mauqe pe har ik baat bhali hoti hai
shab-e-furqat mein ye sadme bhi mazaa dete hain

aansu falak ki aankh se Tapke tamaam raat
aur subh tak zamin kaa aanchal bhigo gae