miri dahliz par chupke se 'paashi' — Kumar Pashi

koi to DhunD ke mujh ko kahin se le aae
ki khud ko dekhaa nahin hai bahut zamaanon se

hain saare inkishaaf apne hain saare mumkinaat apne
ham is duniyaa kaa saaraa ilm le jaaeinge saath apne

kuchh ghazlein un zulfon par hain kuchh ghazlein un aankhon par
jaane vaale dost ki ab ik yahi nishaani baaqi hai

oDh liyaa hai main ne libaadaa shishe kaa
ab mujh ko kisi patthar se Takraane do

teri yaad kaa har manzar pas-manzar likhtaa rahtaa huun
dil ko varaq banaataa huun aur shab bhar likhtaa rahtaa huun

din chaDh aayaa kyon nahin aae jaaein un se puchh aaein
lekin un ke paas to ai dil koi bahaana hogaa hi

main baDaa ho gayaa huun magar bachpanaa
mere dil se kabhi bhi gayaa hi nahin

saaqi ye khamoshi bhi to kuchh ghaur-talab hai
saaqi tire mai-khvaar baDi der se chup hain

roz-e-jazaa mein aakhir puchhaa na jaaegaa kyaa
teraa ye chup lagaanaa meraa savaal karnaa

kisi ne haal jo puchhaa to ho gae khaamosh
tumhaari baat ham apni zabaan se kyaa kahte

vo chup lagi hai ki hanstaa hai aur na rotaa hai
ye ho gayaa hai khudaa jaane dil ko raat se kyaa

kisi akeli shaam ki chup mein
giit puraane gaa ke dekho