Dubne vaale mauj-e-tufaan se — Mahesh Chandra Naqsh

yuun guzarte hain hijr ke lamhe
jaise vo baat karte jaate hain

kis tarah karein tujh se gila tere sitam kaa
madhosh ishaaron ne bhi dil toD diyaa hai

tasvir-e-zindagi mein nayaa rang bhar gae
vo haadse jo dil pe hamaare guzar gae

is Dubte suraj se to ummid hi kyaa thi
hans hans ke sitaaron ne bhi dil toD diyaa hai

aghyaar kaa shikva nahin is ahd-e-havas mein
ik umr ke yaaron ne bhi dil toD diyaa hai

kaun samjhe ham pe kyaa guzri hai 'naqsh'
dil laraz uThtaa hai zikr-e-shaam se

ye jafaaon ki sazaa hai ki tamaashaai hai tu
ye vafaaon ki sazaa hai ki pae-daar huun main

meri vafaa hai meri zamin se juDi hui
pahlaa sabaq hai meraa vatan mere diin kaa

kabhi utraa nahin jo aasmaan se
vafaa utregi us dil par kahaan se

biich kaa baDhtaa huaa har faasla le jaaegaa
ek tufaan aaegaa sab kuchh bahaa le jaaegaa

be-vafaa tum baa-vafaa main dekhiye hotaa hai kyaa
ghaiz mein aane ko tum ho mujh ko pyaar aane ko hai

ho koi mauj-e-tufaan yaa havaa-e-tund kaa jhonkaa
jo pahunchaa de lab-e-saahil usi ko naakhudaa samjho