yaqin jaaniye tab jaa ke pyaar hotaa hai — Mahwar Sirsivi

vo apne ‘abd-e-haqiqi ko aazmaataa hai
har ik bashar kaa yahaan imtihaan nahin hotaa

vaqt ke paanv bhi nahin mehvar
aur raftaar bhi ghazab ki hai

ghaur se dekhnaa hanste hue chehre ki taraf
ek manzar pas-e-manzar kai manzar degaa

aaj gar bole nahin haq baat par
kal sitam honge tumhaari zaat par

ulfat to dekhiye miri didaar ke sabab
darvesh ban ke yaar ki chaukhaT pe aa gayaa

ek muddat se niind taari hai
ek muddat se so nahin paae

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

maashuq se bhi ham ne nibhaai baraabari
vaan lutf kam huaa to yahaan pyaar kam huaa

ho gayaa raaz-e-ishq be-parda
us ne parde se jo nikaalaa munh

mohabbat mein vafaa ki had jafaa ki intihaa kaisi
'mubaarak' phir na kahnaa ye sitam koi sahe kab tak