arz-e-talab par us ki chup se zaahir hai inkaar magar — Malikzaada Manzoor Ahmad

raushan chehra bhigi zulfein duun kis ko kis par tarjih
ek qasida dhuup kaa likkhun ek ghazal barsaat ke naam

kuchh gham-e-jaanaan kuchh gham-e-dauraan donon meri zaat ke naam
ek ghazal mansub hai us se ek ghazal haalaat ke naam

haal-e-pareshaan sun kar meraa aankh mein us ki aansu hain
main ne us se jhuuT kahaa ho aisaa bhi ho saktaa hai

na khauf-e-barq na khauf-e-sharar lage hai mujhe
khud apne baagh ke phulon se Dar lage hai mujhe

kaash daulat-e-gham hi apne paas bach rahti
vo bhi un ko de baiThe aisi maat khaai hai

dekhoge to har moD pe mil jaaeingi laashein
DhunDoge to is shahr mein qaatil na milegaa

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

javaab soch ke vo dil mein muskuraate hain
abhi zabaan pe meri savaal bhi to na thaa

yaad aati hai achchhi si koi baat sar-e-shaam
phir subh talak sochte rahte hain vo kyaa thi

mujh ko ye soch hai jiite hain ve kyun-kar yaa-rab
apne maashuqon se jo shakhs judaa rahte hain

savaal-e-vasl par kuchh soch kar us ne kahaa mujh se
abhi vaada to kar sakte nahin hain ham magar dekho