na khauf-e-barq na khauf-e-sharar lage hai mujhe — Malikzaada Manzoor Ahmad

raushan chehra bhigi zulfein duun kis ko kis par tarjih
ek qasida dhuup kaa likkhun ek ghazal barsaat ke naam

kuchh gham-e-jaanaan kuchh gham-e-dauraan donon meri zaat ke naam
ek ghazal mansub hai us se ek ghazal haalaat ke naam

haal-e-pareshaan sun kar meraa aankh mein us ki aansu hain
main ne us se jhuuT kahaa ho aisaa bhi ho saktaa hai

kaash daulat-e-gham hi apne paas bach rahti
vo bhi un ko de baiThe aisi maat khaai hai

chehre pe saare shahr ke gard-e-malaal hai
jo dil kaa haal hai vahi dilli kaa haal hai

dekhoge to har moD pe mil jaaeingi laashein
DhunDoge to is shahr mein qaatil na milegaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gul kiyaa jis ne vo thaa aur magar
shama ne shikva havaaon se kiyaa

gulaabon ke honTon pe lab rakh rahaa huun
use der tak sochnaa chaahtaa huun

kahaan milegi misaal meri sitamgari ki
ki main gulaabon ke zakhm kaanTon se si rahaa huun

kaanTe se bhi nichoD li ghairon ne bu-e-gul
yaaron ne bu-e-gul se bhi kaanTaa banaa diyaa