kuchh gham-e-jaanaan kuchh gham-e-dauraan donon meri zaat ke naam — Malikzaada Manzoor Ahmad

raushan chehra bhigi zulfein duun kis ko kis par tarjih
ek qasida dhuup kaa likkhun ek ghazal barsaat ke naam

haal-e-pareshaan sun kar meraa aankh mein us ki aansu hain
main ne us se jhuuT kahaa ho aisaa bhi ho saktaa hai

na khauf-e-barq na khauf-e-sharar lage hai mujhe
khud apne baagh ke phulon se Dar lage hai mujhe

kaash daulat-e-gham hi apne paas bach rahti
vo bhi un ko de baiThe aisi maat khaai hai

chehre pe saare shahr ke gard-e-malaal hai
jo dil kaa haal hai vahi dilli kaa haal hai

dekhoge to har moD pe mil jaaeingi laashein
DhunDoge to is shahr mein qaatil na milegaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

fazaa udaas hai rut muzmahil hai main chup huun
jo ho sake to chalaa aa kisi ki khaatir tu

main ne rote hue ponchhe the kisi din aansu
muddaton maan ne nahin dhoyaa dupaTTa apnaa

khud ko is bhiiD mein tanhaa nahin hone deinge
maan tujhe ham abhi buDhaa nahin hone deinge