hone do agar ho gae kuchh log bure bhi — Manzar Suhai

ishq pe ijtihaad kar kar ke
mujtahid ho gayaa huun main gham kaa

mohabbat ki bhi to ik bevafaa se
ye qatl-e-khud nahin to aur kyaa hai

hai isi baat kaa malaal mujhe
ki mujhe ab koi malaal nahin

laDkaa na koi phir se ho barbaad dahr mein
tujh par na jaaein beTiyaan teri khudaa kare

miri nigaah ko gar teri diid ho jaae
qasam khudaa ki miri iid iid ho jaae

raahon ke pattharon kaa bhalaa kyaa gila karun
ab aadmi ke dil bhi to patthar ke ho gae

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gul kiyaa jis ne vo thaa aur magar
shama ne shikva havaaon se kiyaa

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gulaabon ke honTon pe lab rakh rahaa huun
use der tak sochnaa chaahtaa huun

ab us se kahnaa ki agle hisse mein aane vaalaa hai moD aisaa
jahaan kisi kaa main hal banungaa koi miraa masala banegaa