vo kudte uchhalte rangin pairahan the — Mohammad Aazam

kam maarka-e-zist nahin jang-e-uhad se
asbaab-e-jahaan maal-e-ghanimat ki tarah hai

kise batlaaein ham kyon us ki mahfil mein nahin jaate
huzuri jin ko haasil ho vo darbaari nahin karte

hamaare munh pe us ne aaine se dhuup tak pheinki
abhi tak ham samajh kar us ko bachcha chhoD dete hain

bahut jhuk jhuk ke chaltaa huun main in baunon ki basti mein
ye chhoTaa-pan kabhi mujh ko baDaa hone nahin detaa

apne jalne kaa hamesha se tamaashaai huun
aag ye kis ne lagaai mujhe maalum nahin

aasmaanon mein uDaa karte hain phule phule
halke logon ke baDe kaam havaa karti hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe