udaasi anginat yaadein na jaane kitne bichhDe khvaab — Mohammad Yasir Mustafvi

ham se bichhDe hain kai log hamaare apne
ham ne har 'iid pe qurbaan kiyaa hai kuchh kuchh

ham to shaa'ir hain hamein vasl ki parvaah nahin
ham tujhe apne khayaalaat mein chhu lete hain

khud-kushi karne ko dariyaa ki taraf jaataa huun
aur mil jaataa hai har roz kinaare koi

samar kaa chaahnaa hi sirf bejaa hai darakhton se
baraabar in darakhton ki hifaazat bhi zaruri hai

abhi to khuun bahaa hai firaaq mein tere
abhi ye jaan miri jaan ganvaanaa baaqi hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

main ne apni palkon par gham-kade sajaae hain
aarzu ke maatam mein sogvaar hasti hai

ham haal to kah sakte hain apnaa pa kahein kyaa
jab vo idhar aate hain to tanhaa nahin aate