kyaa khabar thi hamein ye zakhm bhi khaanaa hogaa — Mohsin Bhopali

sadaa-e-vaqt ki gar baaz-gasht san paao
mire khayaal ko tum shaairaana kah denaa

hamaari jaan pe dohraa azaab hai 'mohsin'
ki dekhnaa hi nahin ham ko sochnaa bhi hai

iblaagh ke liye na tum akhbaar dekhnaa
ho justuju to kucha-o-baazaar dekhnaa

zindagi gul hai naghma hai mahtaab hai
zindagi ko faqat imtihaan mat samajh

kis qadar naadim huaa huun main buraa kah kar use
kyaa khabar thi jaate jaate vo duaa de jaaegaa

is liye suntaa huun 'mohsin' har fasaana ghaur se
ik haqiqat ke bhi ban jaate hain afsaane bahut

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

sabhi ke apne masaail sabhi ki apni anaa
pukaarun kis ko jo de saath umr bhar meraa

yaad kyaa aataa hai vo meraa lage jaanaa aur aah
pichhe haT kar us kaa ye kahnaa koi aa jaaegaa

siina se siina milaa denaa to kuchh mushkil nahin
yaar mushkil to tire dil se milaanaa dil kaa hai