ab duaaon ke liye uThte nahin hain haath bhi — Mohsin Ehsan

main kharch kaar-e-zamaana mein ho chukaa itnaa
ki aakhirat ke liye paas kuchh bachaa hi nahin

tanhaa khaDaa huun main bhi sar-e-karbalaa-e-asr
aur sochtaa huun mere taraf-daar kyaa hue

main munaqqash huun tiri ruuh ki divaaron par
tu miTaa saktaa nahin bhulne vaale mujh ko

subh se shaam hui ruThaa huaa baiThaa huun
koi aisaa nahin aa kar jo manaa le mujh ko

gham hai na ab khushi hai na ummid hai na yaas
sab se najaat paae zamaane guzar gae

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

nahin nahin main bahut khush rahaa huun tere baghair
yaqin kar ki ye haalat abhi abhi hui hai

zindagi ki bhi yaqinan koi manzil hogi
ye safar hi ki tarah ek safar hai ki nahin

bahut se gham to diye 'zabt' aise logon ne
ki jin se koi tavaqqo na thi vafaa ke sivaa

kis kaam ki aisi sachchaai jo toD de ummidein dil ki
thoDi si tasalli ho to gai maanaa ki vo bol ke jhuuT gayaa