subh se shaam hui ruThaa huaa baiThaa huun — Mohsin Ehsan

main kharch kaar-e-zamaana mein ho chukaa itnaa
ki aakhirat ke liye paas kuchh bachaa hi nahin

tanhaa khaDaa huun main bhi sar-e-karbalaa-e-asr
aur sochtaa huun mere taraf-daar kyaa hue

main munaqqash huun tiri ruuh ki divaaron par
tu miTaa saktaa nahin bhulne vaale mujh ko

ab duaaon ke liye uThte nahin hain haath bhi
be-yaqini kaa to aalam thaa magar aisaa na thaa

kahin kahin koi taara kahin kahin jugnu
jo meri raat thi vo aap kaa saveraa hai

munh chhupaanaa paDe na dushman se
ai shab-e-gham sahar na ho jaae

itne chehron mein mujhe hai ek chehre ki talaash
jis ko main ne kho ke paayaa paa ke khoyaa subh tak

aansu falak ki aankh se Tapke tamaam raat
aur subh tak zamin kaa aanchal bhigo gae

us ne honTon pe lab rakhe bhi na the
mujh mein suraj tulu' hone lagaa

lahja ki jaise subh ki khushbu azaan de
ji chaahtaa hai main tiri aavaaz chuum luun