main aur zauq-e-baada-kashi le gaiin mujhe — Mufti Sadruddin Aazurda

'aazurdaa' mar ke kucha-e-jaanaan mein rah gayaa
di thi duaa kisi ne ki jannat mein ghar mile

is dard-e-judaai se kahin jaan nikal jaae
'aazurdaa' mire haq mein zaraa yuun bhi duaa kar

naaseh yahaan ye fikr hai siina bhi chaak ho
hai fikr-e-bakhiya tujh ko garebaan ke chaak mein

ai dil tamaam nafa hai saudaa-e-ishq mein
ik jaan kaa ziyaan hai so aisaa ziyaan nahin

vo aur vaada vasl kaa qaasid nahin nahin
sach sach bataa ye lafz unhi ki zabaan ke hain

kaTti kisi tarah se nahin ye shab-e-firaaq
shaayad ki gardish aaj tujhe aasmaan nahin

na tum hosh mein ho na ham hosh mein hain
chalo mai-kade mein vahin baat hogi

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

sau fasaad ek ishq mein uTThe
boyaa ik tukhm uge hazaar darakht

dil ki zakhmon ko kiyaa kartaa hai taaza har-dam
phir sitam ye hai ki rone bhi nahin detaa hai

khair dozakh mein mai mile na mile
shaikh-saahab se jaan to chhuTegi

zindagi zor hai ravaani kaa
kyaa thamegaa bahaav paani kaa