dil dukhaanaa miraa nahin maqsad — Mukhtar Tilhari

miri hansi ko sar-e-bazm sah liyaa us ne
phir us ke baa'd akele mein intiqaam liyaa

jis vaqt huaa karti hai bechain tabiat
us vaqt bayaabaan se lagte hain chaman bhi

hamaari samt se be-raghbati na kar varna
tire baghair qaraar aa gayaa to kyaa hogaa

vo aaein ham se dalil maangein
jo kah rahe hain khudaa nahin hai

un se baatein karte karte dil mein Tiis chamak uTThi thi
lafzon par phulon ki ridaa thi maani mein nashtar pinhaan the

miTaanaa chaahun to mumkin kahaan miTaa bhi sakun
vo ek baal jo aaina-e-khayaal mein hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

sameT bikhre hue kaaghzaat ko apne
koi sadaa tujhe vaapas bulaane vaali hai

saunp kar khaana-e-dil gham ko kidhar jaate ho
phir na paaoge agar us ne ye ghar chhoD diyaa

jo dil ne kahi lab pe kahaan aai hai dekho
ab mahfil yaaraan mein bhi tanhaai hai dekho