kaun dariyaa-e-mohabbat se utar saktaa hai paar — Munawar Khan Ghafil

sitaare gum hue khurshid niklaa
araq jab yaar ne ponchhaa jabin se

apne majnun ki zaraa dekh to be-parvaai
pairahan chaak hai aur fikr silaane ki nahin

kucha-e-jaanaan mein yaaro kaun suntaa hai miri
mujh se vaan phirte hain laakhon daad aur be-daad mein

baad marne ke miri qabr pe aayaa 'ghaafil'
yaad aai mire iisaa ko davaa mere baad

jite-ji qadr bashar ki nahin hoti saahab
yaad aaegi tumhein meri vafaa mere baad

vasl mein bhi nahin majaal-e-sukhan
is rasaai pe naa-rasaa hain ham

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

raat din aap charaaghon ko jalaate kyon hain
ghar charaaghon se nahin pyaar se raushan hogaa

ishq itnaa bhi kyaa zaruri hai
koi be-ishq mar nahin jaataa

kaun si baat nai ai dil-e-naakaam hui
shaam se subh hui subh se phir shaam hui

tumhein hamaari mohabbaton ke hasin jazbe bulaa rahe hain
jo ham ne likkhe the tum pe hamdam vo saare naghme bulaa rahe hain