main bhi shaayad aap ko tanhaa milon — Mustafa Shahab

aisaa bhi kabhi ho main jise khvaab mein dekhun
jaagun to vahi khvaab ki taabir bataae

zehn mein yaad ke ghar TuTne lagte hain 'shahaab'
log ho jaate hain ji ji ke puraane kitne

ham mein aur parindon mein farq sirf itnaa hai
dast-o-paa mile ham ko baal-o-par parindon ko

bikhraa bikhraa saa saaz-o-saamaan hai
ham kahin dil kahin aqida kahin

shaayad vo bhuli-bisri na ho aarzu koi
kuchh aur bhi kami si hai teri kami ke saath

kahaa thaa main ne kho kar bhi tujhe zinda rahungaa
vo aisaa jhuuT thaa jis ko nibhaanaa paD gayaa hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

khushi ke daur to mehmaan the aate jaate rahe
udaasi thi ki hamesha hamaare ghar mein rahi

kyuun DhunDne nikle hain nae gham kaa khazina
jab dil bhi vahi dard ki daulat bhi vahi hai