shaayad vo bhuli-bisri na ho aarzu koi — Mustafa Shahab

aisaa bhi kabhi ho main jise khvaab mein dekhun
jaagun to vahi khvaab ki taabir bataae

zehn mein yaad ke ghar TuTne lagte hain 'shahaab'
log ho jaate hain ji ji ke puraane kitne

ham mein aur parindon mein farq sirf itnaa hai
dast-o-paa mile ham ko baal-o-par parindon ko

bikhraa bikhraa saa saaz-o-saamaan hai
ham kahin dil kahin aqida kahin

main bhi shaayad aap ko tanhaa milon
apni tanhaai mein jaa kar dekhiye

kahaa thaa main ne kho kar bhi tujhe zinda rahungaa
vo aisaa jhuuT thaa jis ko nibhaanaa paD gayaa hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

naa-umidi baDh gai hai is qadar
aarzu ki aarzu hone lagi

khvaahishein hain ghar se baahar duur jaane ki bahut
shauq lekin dil mein vaapas lauT kar aane kaa thaa

mujh ko khvaahish hi DhunDne ki na thi
mujh mein khoyaa rahaa khudaa meraa

rang o bu mein Duube rahte the havaas
haae kyaa shai thi bahaar-e-aarzu

khvaahishon ki bijliyon ki jalti bujhti raushni
khinchti hai manzaron mein naqsha-e-aasaab saa