vahshat nahin hai raqs-e-masarrat hai dasht mein — Nadim Nadeem

aah ko saaz banaate hain dukhon ki rut mein
dil-shikasta hain par aavaaz sanbhaale hue hain

kaise kaise log vujud ki zad mein aa kar mar gae
is dariyaa ki bheinT chaDhe kaise kaise tairaak

kyaa nayyaa aur kaisaa khevayyaa chaahne vaalo Duub maro
in aankhon ke dariyaaon mein aaj bhanvar bharpur paDe hain

par kaTe panchhiyon se puchhte ho
tum mein uDne kaa hausla hai kyaa

phuul kitne udaas lagte hain
ai khudaa in ko titliyaan de de

badalte mausamon kaa haath thaame chalne vaalo
sukun pahunchaaegi tum ko shajar-kaari hamaari

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

hamaare marg pe shaadi abas aghyaar karte hain
jahaan se rafta-rafta ek din un ko bhi jaanaa hai

rang aa jaate muTThi mein jugnu ban kar
khushbu kaa paikar hotaa to achchhaa thaa

is liye sab se alag hai miri khushbu 'aami'
mushk-e-mazdur pasine mein liye phirtaa huun

muddat ke baa'd us ne jo ki lutf ki nigaah
ji khush to ho gayaa magar aansu nikal paDe