kaise kaise log vujud ki zad mein aa kar mar gae — Nadim Nadeem

aah ko saaz banaate hain dukhon ki rut mein
dil-shikasta hain par aavaaz sanbhaale hue hain

kyaa nayyaa aur kaisaa khevayyaa chaahne vaalo Duub maro
in aankhon ke dariyaaon mein aaj bhanvar bharpur paDe hain

vahshat nahin hai raqs-e-masarrat hai dasht mein
peDon ki shakl mein ye mire chaar-su ho tum

par kaTe panchhiyon se puchhte ho
tum mein uDne kaa hausla hai kyaa

phuul kitne udaas lagte hain
ai khudaa in ko titliyaan de de

badalte mausamon kaa haath thaame chalne vaalo
sukun pahunchaaegi tum ko shajar-kaari hamaari

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

aansu aansu jis ne dariyaa paar kiye
qatra qatra aab mein uljhaa baiThaa hai

kaun dariyaa-e-mohabbat se utar saktaa hai paar
kashti-e-farhaad aakhir koh se Takraa gai

dariyaa se mauj mauj se dariyaa judaa nahin
ham se judaa nahin hai khudaa aur khudaa se ham

kisi nigaah mein itnaa Thahar ke aai hai
ye kaaenaat bahut ban-sanvar ke aai hai

kuchh to fitrat se mili daanaai
kuchh mayassar hui naa-daanon se