dariyaa mein Dubo deinge sabhi shikve gile ham — Nasim Zahid

tujh ko hai naaqidin se nafrat
tere kamre mein aaina kyon hai

uf rahbaron mein aisaa koi raahbar nahin
jis ki nigaah zarre mein khurshid DhunD le

main sabr kar rahaa huun to zaalim hai taa'na-zan
us ko khabar nahin ki khudaa mere saath hai

kirdaar rahnumaa kaa mujhe lag rahaa hai yuun
talvaar jaise ho kisi paagal ke haath mein

use daulat kamaane ki havas thi
nazar se ab nazaara ho gai hai

aai vo rafta rafta taqaddus ki raah tak
phir yuun huaa ki niyyat-e-naaseh bigaD gai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

jo duur rah ke uDaataa rahaa mazaaq miraa
qarib aayaa to royaa gale lagaa ke mujhe

ai sanam tu vo kanhayyaa hai balaaein luun agar
baansuli ki tarah naalaan hon saraapaa ungliyaan

ye vasl ki rut hai ki judaai kaa hai mausam
ye gulshan-e-dil hai ki bayaabaan kahin kaa