aag duniyaa ki lagaai hui bujh jaaegi — Nazeer Baaqri

khuub gae pardes ki apne divaar-o-dar bhuul gae
shish-mahal ne aisaa gheraa miTTi ke ghar bhuul gae

is liye chal na sakaa koi bhi khanjar mujh par
meri shah-rag pe miri maan ki duaa rakkhi thi

main ne duniyaa chhoD di lekin miraa murda badan
ek uljhan ki tarah qaatil ki nazron mein rahaa

khaDaa huun aaj bhi roTi ke chaar harf liye
savaal ye hai kitaabon ne kyaa diyaa mujh ko

zakhm kitne tiri chaahat se mile hain mujh ko
sochtaa huun ki kahun tujh se magar jaane de

apni aankhon ke samundar mein utar jaane de
teraa mujrim huun mujhe Duub ke mar jaane de

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

vo dard huun koi chaara nahin hai jis kaa kahin
vo zakhm huun ki hai dushvaar indimaal miraa

dard mein lazzat bahut ashkon mein raanaai bahut
ai gham-e-hasti hamein duniyaa pasand aai bahut

bahut ghurur thaa biphre hue samundar ko
magar jo dekhaa mire aansuon se kam-tar thaa