nashshe mein sujhti hai mujhe duur duur ki — Nazm Tabatabai

yuun main sidhaa gayaa vahshat mein bayaabaan ki taraf
haath jis tarah se aataa hai garebaan ki taraf

dard-e-dil se ishq ke be-pardagi hoti nahin
ik chamak uThti hai lekin raushni hoti nahin

bichhaD ke tujh se mujhe hai umiid milne ki
sunaa hai ruuh ko aanaa hai phir badan ki taraf

dil is tarah havaa-e-mohabbat mein jal gayaa
bhaDki kahin na aag na uTThaa dhuaan kahin

banaayaa toD ke aaina aaina-khaana
na dekhi raah jo khalvat se anjuman ki taraf

asiri mein bahaar aai hai fariyaad-o-fughaan kar lein
nafas ko khun-fishaan kar lein qafas ko bostaan kar lein

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

mashrab mein to durust kharaabaatiyon ke hai
mazhab mein zaahidon ke nahin gar ravaa sharaab

ai mohabbat tire anjaam pe ronaa aayaa
jaane kyuun aaj tire naam pe ronaa aayaa

shaikh ki daavat mein mai kaa kaam kyaa
ehtiyaatan kuchh mangaa li jaaegi

is tarah rail ke hamraah ravaan hai baadal
saath jaise koi uDtaa huaa mai-khaana chale