chhin gai kursi to leader par uThaa liin kursiyaan — Popular Meeruthi

dastakhat to tumhein bhi aate hain
abbaa tum bhi vazir ban jaate

khud tiis kaa hai aur dulhan saaTh baras ki
girti hui divaar ke saae mein khaDaa hai

be-vaqufi ke anokhe kaarnaame dekh kar
achchhe-khaase leaderon ko bhi gadhaa kahnaa paDaa

apni shohrat ki alag raah nikaali ham ne
kisi divaan se ghazal koi churaa li ham ne

teraa aadhaa kaam khud insaan hi karne lage
kaam teraa ab to ai shaitaan aadhaa rah gayaa

meraa sasuraal mein koi bhi taraf-daar nahin
un ke honTon pe bhi taale hain khudaa khair kare

Dartaa huun dekh kar dil-e-be-aarzu ko main
sunsaan ghar ye kyuun na ho mehmaan to gayaa

hamaare khauf ki khallaaqiyaan khudaa ki panaah
vo bijliyaan hain nazar mein jo aasmaan mein nahin

baad murdan bhi hai teraa khauf mujh ko is qadar
aankh uThaa kar main ne jannat mein na dekhaa huur ko

ye hu kaa vaqt ye jangal ghanaa ye kaali raat
suno yahaan koi khatra nahin Thahar jaao

bhes mein masarrat ke gham kahin na aayaa ho
is sabab se Dar Dar kar ham khushi se milte hain

main Dar rahaa huun tumhaari nashili aankhon se
ki luuT lein na kisi roz kuchh pilaa ke mujhe