rukte nahin hain paa-e-jihat-aashnaa kahin — Raaz Muradabadi

vo kyaa chhuTe hayaat ke 'unvaan badal gae
duniyaa samajh rahi hai abhi ji rahaa huun main

dil ki be-kaifiyon ko kyaa kiije
fasl-e-gul hai magar bahaar nahin

khud kiyaa tark-e-ta'alluq ham se
khud hi ranjur hue jaate hain

allah-re iltifaat-o-nadaamat ki saazishein
nazrein milin talaafi-e-maafaat ho gai

kisi ke vaada-e-sabr-aazmaa ki khair ki ham
ab e'tibaar ki had se guzarte jaate hain

miri samt manzil ko baDhte jo dekhaa
miraa saath chhoDaa mire rahnumaa ne

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

kin manzilon luTe hain mohabbat ke qaafile
insaan zamin pe aaj gharib-ul-vatan saa hai