paiham mauj-e-imkaani mein — Rajinder Manchanda Bani

yaad tiri jaise ki sar-e-shaam
dhund utar jaae paani mein

thi paanv mein koi zanjir bach gae varna
ram-e-havaa kaa tamaashaa yahaan rahaa hai bahut

koi bhuli hui shai taaq-e-har-manzar pe rakkhi thi
sitaare chhat pe rakkhe the shikan bistar pe rakkhi thi

shaamil huun qaafile mein magar sar mein dhund hai
shaayad hai koi raah judaa bhi mire liye

vo TuTte hue rishton kaa husn-e-aakhir thaa
ki chup si lag gai donon ko baat karte hue

mohabbatein na rahin us ke dil mein mere liye
magar vo miltaa thaa hans kar ki vaza-daar jo thaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

paagal-pan mein aa kar paagal kuchh bhi to kar saktaa hai
khud ko izzat-daar samajhne vaale mujh se duur rahein

ab tak tire honTon pe tabassum kaa gumaan hai
ham ko to hai mahbub yahi aadh-khilaa phuul

koi samjhegaa kyaa raaz-e-gulshan
jab tak uljhe na kaanTon se daaman