vo ye kahte hain sadaa ho to tumhaare jaisi — Rauf Raza

mere siine se nikaalo miri buniyaad ki jaan
itni aasaani se viraan nahin hotaa main

ham ko vaise bhi koi kaam nahin aataa hai
aur ye kaam haqiqat ko fasaana karnaa

ab ye pathraai hui aankhein liye phirte raho
main ne kab tum se kahaa thaa mujhe itnaa dekho

saare naakaam-e-tamannaa mire dil tak aa jaaein
aaj vo kaam kareinge ki jo hone kaa nahin

vo jo ik shakhs tumhein yaad kiyaa kartaa thaa
aaj masruf bahut hai use tum yaad karo

vo to bachchon ki patangon ne use gher liyaa
varna chupke se nikal jaati bahaar aai hui

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

duur rahti hain sadaa un se balaaein saahil
apne maan baap ki jo roz duaa lete hain

aab-dida huun main khud zakhm-e-jigar se apne
teri aankhon mein chhupaa dard kahaan se dekhun

lazzat-e-zindagi vo kyaa jaane
jis ko dard-e-jigar nahin hotaa