uThti chali gai hai koi aur hi sadaa — Riasath Ali Asrar

chaandni surkh si dikhaai de
ye moharram kaa chaand hai 'asraar'

ham na aae junun ke bas mein kabhi
ye garebaan khirad ne chaak kiyaa

be-karaan dasht-e-tasavvur mein bhaTakne ke nuqush
mauj-dar-mauj saraabon se ubharte honge

aap ham se judaa nahin hote
aap par ikhtiyaar hai koi

kyaa us se bichhaDte ki mile hi na the jis se
ik-tarfa mohabbat ke bhi hain zaaviye kyaa kyaa

mahv hain hazrat-e-khayaal apne
haal-e-dil mein muraaqiba baandhe

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ai gham-e-ishq tujh se haar gae
jaan de kar bhi sharmsaar uThe

najd se jaanib-e-lailaa jo havaa aati hai
dil-e-majnun ke dhaDakne ki sadaa aati hai

kaun se dukh ko palle baandhein kis gham ko tahrir karein
yaan to dard sivaa hotaa hai aur bhi arz-e-haal ke baad