ham jaante hain lutf-e-taqaazaa-e-mai-farosh — Riyaz Khairabadi

mai-khaane mein mazaar hamaaraa agar banaa
duniyaa yahi kahegi ki jannat mein ghar banaa

aap aae to khayaal-e-dil-e-naashaad aayaa
aap ne yaad dilaayaa to mujhe yaad aayaa

ghurur bhi jo karun main to aajizi ho jaae
khudi mein lutf vo aae ki be-khudi ho jaae

baDe paak tinat baDe saaf baatin
'riyaaz' aap ko kuchh hamin jaante hain

ham jaam-e-mai ke bhi lab-e-tar chuste nahin
chaskaa paDaa huaa hai tumhaari zabaan kaa

aisi hi intizaar mein lazzat agar na ho
to do ghaDi firaaq mein apni basar na ho

kyon tasavvur mein ji rahaa huun main
jab haqiqat mein mar hi jaanaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

aks-e-yaad-e-yaar ko dhundlaa kiyaa hai
main ne khud ko jaan kar tanhaa kiyaa hai

jis ko jaanaa hi nahin us ko khudaa kyuun maanein
aur jise jaan chuke hon vo khudaa kaise ho