tu na rusvaa ho is liye ham ne — Saadullah Shah

apni sochein safar mein rahti hain
us ko paane ki justuju dekho

mujh saa koi jahaan mein naadaan bhi na ho
kar ke jo ishq kahtaa hai nuqsaan bhi na ho

tum ne kaisaa ye raabta rakkhaa
na mile ho na faasla rakkhaa

tu ruke yaa na ruke faisla tujh par chhoDaa
dil ne dar khol diye hain tiri aasaani ko

aise lagtaa hai ki kamzor bahut hai tu bhi
jiit kar jashn manaane ki zarurat kyaa thi

sabhi se jab mohabbat chaahte ho
mohabbat kyon nahin karte sabhi se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

main ne ibaadaton ko mohabbat banaa diyaa
aankhein buton ke saath rahin dil khudaa ke saath

vo chaahtaa thaa ki dekhe mujhe bikharte hue
so us kaa jashn ba-sad-ehtimaam main ne kiyaa

dil ke dariyaa ne kinaaron se mohabbat kar li
tez bahtaa hai magar kam nahin hone paataa

shauq hai tujh ko zamaane mein tiraa naam rahe
aur mujhe Dar hai mohabbat miri bad-naam na ho