kuchh log ibtidaa-e-rifaaqat se qabl hi — Saeed Ahmad

ham bhi usi ke saath gae hosh se 'said'
lamha jo qaid-e-vaqt se baahar chalaa gayaa

jo tire khitta-e-be-aab ki khvaahish na banaa
kulbulaataa hai vo dariyaa kisi kohsaar mein gum

us din se paaniyon ki tarah bah rahe hain ham
jis din se pattharon kaa iraada samajh liyaa

sab karishme taalluqaat ke hain
khaak uDti hai khaak-daan mein kyaa

jal thal kaa khvaab thaa ki kinaare Dubo gayaa
tanhaa kanval bhi jhiil se baahar nikal paDaa

khushk patton mein kisi yaad kaa shoala hai 'said'
main bujhaataa huun magar aag bhaDak jaati hai

jab ki pahlu se yaar uThtaa hai
dard be-ikhtiyaar uThtaa hai

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

ye bhi kyaa kam hai basirat ki nazar haasil hui
doston ne ki jo tujh se dushmani maatam na kar

na guftugu mein tasalli na khaamushi mein sadaa
suluk-e-dost kaa andaaz hi niraalaa hai

pyaar karne vaalon kaa sirf ek sahraa hai
saare shahr us ke hain saari bastiyaan us ki

sunaa ai dosto tum ne ki shaaer hain 'muzaffar' bhi
ba-zaahir aadmi kitne bhale maalum hote hain