sab karishme taalluqaat ke hain — Saeed Ahmad

ham bhi usi ke saath gae hosh se 'said'
lamha jo qaid-e-vaqt se baahar chalaa gayaa

jo tire khitta-e-be-aab ki khvaahish na banaa
kulbulaataa hai vo dariyaa kisi kohsaar mein gum

us din se paaniyon ki tarah bah rahe hain ham
jis din se pattharon kaa iraada samajh liyaa

kuchh log ibtidaa-e-rifaaqat se qabl hi
aainda ke har ek guzishta tak aa gae

jal thal kaa khvaab thaa ki kinaare Dubo gayaa
tanhaa kanval bhi jhiil se baahar nikal paDaa

khushk patton mein kisi yaad kaa shoala hai 'said'
main bujhaataa huun magar aag bhaDak jaati hai

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

agar khamosh rahun main to tu hi sab kuchh hai
jo kuchh kahaa to tiraa husn ho gayaa mahdud

kuchh to apne liye bhi rakhnaa hai
zakhm auron ko kyuun dikhaaein sab

kyuun na TuuTe miri tauba jo kahe tu saaqi
pi le pi le are ghanghor ghaTaa chhaai hai

ham se mai-kash jo tauba kar baiThein
phir ye kaar-e-savaab kaun kare