qismaton se milaa hai dard hamein — Safdar Mirzapuri

ghar to kyaa ghar kaa nishaan bhi nahin baaqi 'safdar'
ab vatan mein kabhi jaaeinge to mehmaan honge

ik nigaah-e-ghalat-andaaz sahi
dil ki aakhir koi qimat hogi

jaur-e-aflaak ki shirkat ki zarurat kyaa hai
aap kaafi hain zamaane ko sataane ke liye

qimat-e-jins-e-vafaa nim-nigaahi tauba
aisi baatein na karein aap ki saudaa na bane

zaraa vo khaak mein milne na de khun-e-shahidaan ko
khudaa taufiq de itni zamin-e-ku-e-jaanaan ko

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

dard kaa zaaiqa bataaun kyaa
ye ilaaqa zabaan se baahar hai

tumhaare hisse ke jitne bhi gham hain main le luun
mire nasib ki har ik khushi mile tum ko

ek dard ki lazzat barqaraar rakhne ko
kuchh latif jazbon ki khuun se aabyaari ki