gham-e-maujud ghalat aur gham-e-fardaa baatil — Sahir Dehlavi

ahd-e-misaaq kaa laazim hai adab ai vaaiz
hai ye paimaan-e-vafaa rishta-e-zunnaar na toD

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa

mil-milaa ke donon ne dil ko kar diyaa barbaad
husn ne kiyaa be-khud ishq ne kiyaa aazaad

jo laa-mazhab ho us ko millat-o-mashrab se kyaa matlab
miraa mashrab hai rindi rind ko mazhab se kyaa matlab

aate hue is tan mein na jaate hue tan se
hai jaan-e-makin ko na lagaavaT na rukaavaT

qadam hai ain hudus aur hudus ain qadam
jo tu na jalve mein aataa to main kahaan hotaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

sunne vaale ro diye sun kar mariz-e-gham kaa haal
dekhne vaale taras khaa kar duaa dene lage

sabhi khush hain ki saare gum-shuda phir mil gae hain
mujhe gham hai ki ab teri kami gum ho gai hai

dhuaan detaa hai daamaan-e-mohabbat
in aankhon se koi aansu giraa hai