us se meraa koi rishta niklaa — Sandeep Gupte

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

koi bhi shakhs duniyaa mein tumhein chhoTaa nazar na aae
tum apne sochne kaa daaera itnaa baDaa kar lo

ham ehtiyaat ki aisi misaal dete hain
tumhaaraa zikr bhi aayaa to Taal dete hain

tu kahaan rahti hai puchhaa thaa kisi ne ek din
main ghamon ke saath rahti huun khushi kahne lagi

main tumhaare shahr ki tahzib se vaaqif na thaa
pattharon se ki nahin thi guftugu pahle kabhi

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

vo dard huun koi chaara nahin hai jis kaa kahin
vo zakhm huun ki hai dushvaar indimaal miraa

baarish ke baa'd raat saDak aaina si thi
ik paanv paaniyon pe paDaa chaand hil gayaa

nur-e-sahar kahaan hai agar shaam-e-gham gai
kab iltifaat thaa ki jo khu-e-sitam gai