chashm-e-bad-dur ajab khush-qad-o-qaamat hogaa — Santokh Rai Betab

khudaa kisi ko giraftaar zulf kaa na kare
nasib mein kisi kaafir ke ye balaa na kare

na rahe baagh-e-jahaan mein kabhi aaraam se ham
phans gae qaid-e-qafas mein jo chhuTe daam se ham

apne mazhab mein hai ik shart tariq-e-ikhlaas
kuchh gharaz kufr se rakhte hain na islaam se ham

aah di siine mein aatish kaun si be-dard ne
dil se le kar munh talak umDaa huaa ik dard hai

mohabbat ki bhi kyaa hotin nahin ai ham-nashin raahein
ki khubaan yuun hamein dukh dein, ham un ko is tarah chaahein

go ki tujh lutf ke qaabil dil-e-ranjur nahin
par tiri banda-navaazi se ye kuchh duur nahin

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

sab ko qudrat thi khush-kalaami par
khaamushi mein zabaan-daraaz thaa main

ai chaman vaalo chaman mein yuun guzaaraa chaahiye
baaghbaan bhi khush rahe raazi rahe sayyaad bhi