dar-ba-dar hone se pahle kabhi sochaa bhi na thaa — Saqi Amrohvi

kitne hi gham nikharne lagte hain
ek lamhe ki shaadmaani se

zindagi bhar mujhe is baat ki hasrat hi rahi
din guzaarun to koi raat suhaani aae

madrasa meraa meri zaat mein hai
khud moallim huun khud kitaab huun main

tu nahin to tiraa khayaal sahi
koi to ham-khayaal hai meraa

mujh ko kyaa kyaa na dukh mile 'saaqi'
mere apnon ki mehrbaani se

mein ab tak din ke hangaamon mein gum thaa
magar ab shaam hoti jaa rahi hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

soch din raat yahi hai tire divaane ki
jaaiye shahr ko par chhoDiye sahraa kyunkar

apne majnun ki zaraa dekh to be-parvaai
pairahan chaak hai aur fikr silaane ki nahin

sazaa ke jhelne vaale ye sochnaa hai gunaah
koi qusur bhi tujh se kabhi huaa ki nahin

bhalaa koi vaa'da-khilaafi ki had hai hisaab apne dil mein lagaa kar to socho
qayaamat kaa din aa gayaa rafta rafta mulaaqaat kaa din badalte badalte