madrasa meraa meri zaat mein hai — Saqi Amrohvi

kitne hi gham nikharne lagte hain
ek lamhe ki shaadmaani se

zindagi bhar mujhe is baat ki hasrat hi rahi
din guzaarun to koi raat suhaani aae

tu nahin to tiraa khayaal sahi
koi to ham-khayaal hai meraa

dar-ba-dar hone se pahle kabhi sochaa bhi na thaa
ghar mujhe raas na aayaa to kidhar jaaungaa

mujh ko kyaa kyaa na dukh mile 'saaqi'
mere apnon ki mehrbaani se

mein ab tak din ke hangaamon mein gum thaa
magar ab shaam hoti jaa rahi hai

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tire nazdik aa kar sochtaa huun
main zinda thaa ki ab zinda huaa huun

vo itni shiddaton se sochtaa hai
ki jaise main bhi koi masala huun

yuun saraapaa iltijaa ban kar milaa thaa pahle roz
itni jaldi vo khudaa ho jaaegaa sochaa na thaa

us ko sochun to dhyaan mein mere
khushbu aati hai pahli baarish ki