kitne hi gham nikharne lagte hain — Saqi Amrohvi

zindagi bhar mujhe is baat ki hasrat hi rahi
din guzaarun to koi raat suhaani aae

madrasa meraa meri zaat mein hai
khud moallim huun khud kitaab huun main

tu nahin to tiraa khayaal sahi
koi to ham-khayaal hai meraa

dar-ba-dar hone se pahle kabhi sochaa bhi na thaa
ghar mujhe raas na aayaa to kidhar jaaungaa

mujh ko kyaa kyaa na dukh mile 'saaqi'
mere apnon ki mehrbaani se

mein ab tak din ke hangaamon mein gum thaa
magar ab shaam hoti jaa rahi hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

havaa ki Dor mein TuuTe hue taare piroti hai
ye tanhaai ajab laDki hai sannaaTe mein roti hai

chuDiyaan kyuun utaar diin tum ne
subhein kitni udaas rahti hain

phailaa huaa hai jism mein tanhaaiyon kaa zahr
rag rag mein jaise saari udaasi utar gai