lambi hai bahut aaj ki shab jaagne vaalo — Sarfaraz Khalid

kisi ne jaan hi luTaa di vafaaon ki khaatir
tum hi bataao ki qissa ye kis kitaab kaa hai

vo bhi na aayaa umr-e-guzishta ke misl hi
ham bhi khaDe rahe dar-o-divaar ki tarah

tiri duaaein bhi shaamil hain koshishon mein miri
musibaton kaa na Talnaa ajiib lagtaa hai

siyaah raat ke pahlu mein jism ke andar
kisi gunaah ki khvaahish ko paalte rahnaa

milte ho to ab tum bhi bahut rahte ho khaamosh
kyaa tum ko bhi ab meri khabar hone lagi hai

ham kisi aur vaqt ke hain asiir
subh ke shaam ke rahe hi nahin

mere khvaabon ke jharokon ko sajaate rahiye
na sahi vasl magar yaad to aate rahiye

us kaa ham se baat karnaa yaad karnaa pyaar karnaa
ik ghalat-fahmi thi jo ab duur hoti jaa rahi hai

saveraa le ke aataa hai mire khvaabon ki taabirein
magar jab shaam hoti hai to un ki yaad aati hai

meri taraf se khaatir-e-sayyaad jamaa hai
kyaa uD sakegaa taair-e-be-baal-o-par kahin

aavaara o majnun hi pe mauquf nahin kuchh
milne hain abhi mujh ko khitaab aur ziyaada

use ab bhuul jaane kaa iraada kar liyaa hai
bharosa ghaaliban khud par ziyaada kar liyaa hai