jise anjaam tum samajhti ho — Sarvat Husain

saya-e-abr se puchho 'sarvat'
apne hamraah agar le jaae

shahzaadi tujhe kaun bataae tere charaag-kade tak
kitni mehraabein paDti hain kitne dar aate hain

kyuun girafta-dil nazar aati hai ai shaam-e-firaaq
ham jo tere naaz uThaane ke liye maujud hain

ik daastaan ab bhi sunaate hain farsh o baam
vo kaun thi jo raqs ke aalam mein mar gai

siyaahi pherti jaati hain raatein bahr o bar pe
inhi taarikiyon se mujh ko bhi hissa milegaa

teri aashufta-mizaaji ai dil
kyaa khabar kaun nagar le jaae

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

jo zakhm judaai ke diye un pe miri jaan
sastaa saa hi marham tu lagaane ke liye aa

ridaa-e-sang oDh kar na so gayaa ho kaanch bhi
harim-e-zakhm laazmi hai khair-o-shar ki jaanch bhi

raste se miri jang bhi jaari hai abhi tak
aur paanv tale zakhm ki vahshat bhi vahi hai

suno aao nayaa ik zakhm bakhsho
tumhaaraa hijr buDhaa ho gayaa hai