suno aao nayaa ik zakhm bakhsho — Zoya Shaikh

hamein us se judaa honaa paDaa thaa
hamaare beach duniyaa aa gai thi

khaamushi kaa sabab nahin kuchh bhi
mujh ko bas guftugu se nafrat hai

vo miri saadgi pe martaa hai
mujh ko gahnon ki kyaa zarurat hai

khuddaar khud-parast hain ziddi balaa ke hain
ham jo gae to lauT ke vaapas na aaeinge

phir yuun huaa ki zindagi ik bojh ban gai
ik shakhs mere haath se yak-lakht kho gayaa

ishq hai mujh se use yaa ki faqat hamdardi
jab bhi vo chhoD ke jaataa hai palaT aataa hai

uf shab-e-hijr ki siyaahi aaj
kufr ki tirgi se baDh kar hai

nuqta-e-injimaad ko pahunchaa
mausam-e-hijr dard-e-tanhaai

kuchh be-Thikaana karti rahin hijratein mudaam
kuchh meri vahshaton ne mujhe dar-ba-dar kiyaa

honaa hai dard-e-ishq se gar lazzat-aashnaa
dil ko kharaab-e-talkhi-e-hijraan to kijiye

mujhe bhi lamha-e-hijrat ne kar diyaa taqsim
nigaah ghar ki taraf hai qadam safar ki taraf

nasha kar lein nashe kaaTein manaaein hijr yaadon kaa
hamein maan baap ne is vaaste thoDe hi paalaa thaa