ik zamaane tak badan be-khvaab be-aadaab the — Shaheen Abbas

ye din aur raat kis jaanib uDe jaate hain sadiyon se
kahin rukte to main bhi shaamil-e-parvaaz ho saktaa

us ke baa'd agli qayaamat kyaa hai kis ko hosh hai
zakhm sahlaataa thaa aur ab daagh dikhlaataa huun main

apni si khaak uDaa ke baiTh rahe
apnaa saa qaafila banaate hue

harf ke aavaaza-e-aakhir ko kar detaa huun nazm
sher kyaa kahtaa huun khaamoshi ko phailtaa huun main

ab khulaa khvaab mein kuchh khvaab milaataa thaa main
khaak uDaataa thaa main sayyaaron ki sayyaaron par

lahu ke kinaare bhi zad par hain donon
ye kyaa zakhm hai mundamil hone vaalaa

ret par ik nishaan hai shaayad
ye hamaaraa makaan hai shaayad

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae