kisi nigaah mein itnaa Thahar ke aai hai — Shahnawaz Farooqi

kitaab-e-ishq mein saae kaa matlab
dar-o-divaar kaa saaya nahin hai

kabhi ye gham thaa ki samjhaa nahin koi ham ko
aur ab ye Dar ki kisi ne samajh liyaa hi na ho

judaai se ziyaada jaan-levaa
mohabbat mein mohabbat ki kami hai

husn aisaa thaa ki har ik aainaa kam paD gayaa
aaina kyaa umr bhar kaa dekhnaa kam paD gayaa

ye jahaan ek tamaashaa hai sabhi kahte hain
tum na hote to ise ham bhi tamaashaa kahte

dard thaa haijaan thaa par aankh mein aansu na the
jaise dil tak aate aate haadisa kam paD gayaa

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

khudaa ki itni baDi kaaenaat mein main ne
bas ek shakhs ko maangaa mujhe vahi na milaa

hai ikhtiyaar hamein kaaenaat par haasil
savaal ye hai ki ham kis ke ikhtiyaar mein hain

mujh se ye pyaas kaa sahraa nahin dekhaa jaataa
roz ab khvaab mein dariyaa nahin dekhaa jaataa