kaar-e-duniyaa ko bhi kaar-e-ishq mein shaamil samajh — Shakeel Jazib

yahaan pe kuchh bhi nahin hai baaqi tu aks apnaa talaash mat kar
miri nigaahon ke aaine ab ghubaar-e-furqat se aT gae hain

mujh ko ataa huaa hai ye kaisaa libaas-e-zist
baDhte hain jis ke chaak baraabar rafu ke saath

us ki bhi miri tarah thi ik apni kahaani
us ko bhi nibhaanaa paDaa kirdaar mujhe bhi

kyaa karun ai tishnagi teraa mudaavaa bas vo lab
jin labon ko chhu ke paani aag bantaa jaae hai

yaaro duaa karo ye koi haadsa na ho
pahle yuun intizaar mein lazzat kabhi na thi

kyaa kisi ummid par phir se dar-e-dil vaa karun
tujh se baDh kar khud bataa meraa shanaasaa kaun thaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

phir na kiije miri gustaakh-nigaahi kaa gilaa
dekhiye aap ne phir pyaar se dekhaa mujh ko

koi to aisaa ghar hotaa jahaan se pyaar mil jaataa
vahi begaane chehre hain jahaan jaaein jidhar jaaein